Chapter index - - Next chapter

11

UJesu ufundisa ngokukhuleka

1 Kwasekusithi ekhuleka endaweni ethile, eseqedile, omunye wabafundi bakhe wathi kuye: Nkosi, sifundise ukukhuleka, njengoJohane laye wafundisa abafundi bakhe. 2 Wasesithi kubo: Nxa likhuleka, libokuthi: Baba wethu osemazulwini, kalihlonitshwe ibizo lakho. Umbuso wakho kawuze. Intando yakho kayenziwe, emhlabeni njengezulwini. 3 Siphe insuku ngensuku ukudla kwethu kwensuku zonke. 4 Njalo usithethelele izono zethu, ngoba lathi sibathethelela bonke abasonayo. Njalo ungasingenisi ekulingweni, kodwa usikhulule ebubini.

Umfanekiso womngane ofika phakathi kobusuku

5 Wasesithi kubo: Nguwuphi kini olomngane, futhi aye kuye phakathi kobusuku, athi kuye: Mngane, ake ungeboleke izinkwa ezintathu, 6 ngoba kufike kimi umngane wami evela ekuhambeni, kodwa kangilalutho engingalubeka phambi kwakhe; 7 longaphakathi aphendule athi: Ungangihluphi; umnyango usuvaliwe, labantwana bami abancane balami embhedeni; kangingeke ngivuke ngikunike. 8 Ngithi kini: Loba engazukuvuka amnike, ngoba engumngane wakhe, kodwa ngenxa yokuphikelela kwakhe uzavuka amnike konke akuswelayo. 9 Mina-ke ngithi kini: Celani, lizaphiwa; dingani, lizathola; qoqodani, lizavulelwa. 10 Ngoba wonke ocelayo uyemukela; lodingayo uyathola; loqoqodayo uyavulelwa. 11 Kambe, nguwuphi kini onguyise ongathi indodana icela isinkwa, ayinike ilitshe? Loba inhlanzi, ayinike inyoka endaweni yenhlanzi yini? 12 Loba icela iqanda, ayinike ufezela yini? 13 Ngakho uba lina elingababi likwazi ukupha abantwana benu izipho ezinhle, kakhulu kangakanani uBaba osezulwini uzabapha uMoya oNgcwele abacela kuye.

Isono sokuhlambaza

14 Wayesekhipha idimoni, elaliyisimungulu. Kwasekusithi, seliphumile idimoni, wakhuluma oyisimungulu; amaxuku asemangala. 15 Kodwa abanye babo bathi: Ukhipha amadimoni ngoBelezebule inkosi yamadimoni. 16 Labanye bemlinga badinga kuye isibonakaliso esivela ezulwini. 17 Kodwa yena eyazi imicabango yabo wathi kubo: Wonke umbuso owehlukene wodwa uyachitheka; njalo indlu emelene lendlu iyadilika. 18 Njalo uba uSathane laye ehlukene ngokwakhe, umbuso wakhe uzakuma njani? Ngoba lithi, ngikhipha amadimoni ngoBelezebule. 19 Njalo uba mina ngikhipha amadimoni ngoBelezebule, amadodana enu akhipha ngobani? Ngakho wona azakuba ngabagwebi benu. 20 Kodwa uba ngikhipha amadimoni ngomunwe kaNkulunkulu, isibili umbuso kaNkulunkulu usufikile kini. 21 Uba isiqhwaga sihlomile silinda owaso umuzi, impahla yaso isekuthuleni; 22 kodwa nxa olamandla kulaso esisukela asinqobe, uyasemuka izikhali zaso ebesithembele kuzo, abesesaba impango yaso. 23 Ongelami, umelene lami; longabuthi lami uyachithiza.

Ukuphenduka okungapheleliyo

24 Nxa umoya ongcolileyo esephumile emuntwini, uyahamba adabule indawo ezomileyo, edinga ukuphumula; kodwa engakutholi athi: Ngizabuyela endlini yami engaphuma kuyo; 25 njalo esefikile ayifice ithanyelwe njalo ilungisiwe. 26 Abesehamba azithathele abanye omoya abayisikhombisa ababi kulaye uqobo, besebengena bahlale lapho; njalo ukucina kwalowomuntu kube kubi kulokwakuqala.

27 Kwasekusithi ekhuluma lezizinto, owesifazana othile exukwini waphakamisa ilizwi wathi kuye: Sibusisiwe isisu esakuthwalayo, lamabele owawamunyayo. 28 Kodwa yena wathi: Kodwa ikakhulu babusisiwe abalizwayo ilizwi likaNkulunkulu balilondoloze.

Abafuna isibonakaliso

29 Kwathi sekubuthene amaxuku ngobunengi waqala ukuthi: Lesisizukulwana sibi; sidinga isibonakaliso, kodwa kasiyikunikwa isibonakaliso, ngaphandle kwesibonakaliso sikaJona umprofethi. 30 Ngoba njengalokhu uJona waba yisibonakaliso kwabeNinive, leNdodana yomuntu izakuba njalo kulesisizukulwana. 31 Inkosikazi yeningizimu izasukuma kusigwebo kanye lamadoda alesisizukulwana, iwalahle; ngoba yavela emikhawulweni yomhlaba ukuzwa inhlakanipho kaSolomoni, njalo khangelani, kukhona lapha omkhulu kuloSolomoni. 32 Amadoda eNinive azasukuma kusigwebo kanye lalesisizukulwana, asilahle; ngoba aphenduka ngokutshumayela kukaJona, njalo khangelani, kukhona lapha omkhulu kuloJona.

Imifanekiso yezibane

33 Futhi kakho othi eselumathise isibane asibeke ekusithekeni, loba ngaphansi kwesitsha, kodwa phezu kwesiqobane sesibane, ukuze abangenayo babone ukukhanya.

34 Isibane somzimba lilihlo; ngakho nxa ilihlo lakho liphilile, lomzimba wakho wonke ugcwele ukukhanya; kodwa nxa lilibi, lomzimba wakho uzakuba lobunyama. 35 Ngakho qaphela ukuthi ukukhanya okukuwe kungabi ngumnyama. 36 Ngakho uba umzimba wakho wonke ugcwele ukukhanya, ungelandawo emnyama, uzakhanya wonke, njengesibane sikukhanyisa ngokukhanya kwaso.

UJesu usola abaFarisi lezazumlayo

37 Kwathi esakhuluma, umFarisi othile wamcela ukuthi adle laye; wasengena wahlala ekudleni. 38 Kwathi umFarisi ebona lokhu wamangala ukuthi kazange aqale ageze engakadli. 39 Yasisithi iNkosi kuye: Khathesi lina baFarisi lihlambulula ingaphandle yenkezo leyesitsha, kodwa ingaphakathi yenu igcwele ukuphanga lobubi. 40 Zithutha, yena owenza ingaphandle kayenzanga lengaphakathi yini? 41 Kodwa phanini kube yizipho lezozinto ezingaphakathi; khangelani-ke, konke kuzahlambuluka kini.

42 Kodwa maye kini baFarisi! Ngoba lithela okwetshumi kwetswayi leganga leruwi*, lemibhida yonke, njalo lingananzeleli isigwebo lothando lukaNkulunkulu; belifanele ukwenza lezizinto, lingaziyekeli lalezo.

43 Maye kini baFarisi! Ngoba lithanda izihlalo zabahloniphekayo emasinagogeni, lokubingelelwa emisikeni.

44 Maye kini, babhali labaFarisi, bazenzisi! Ngoba lifanana lamangcwaba angabonakaliyo, labantu abahamba phezu kwawo bengawazi.

45 Omunye wezazimthetho wasephendula wathi kuye: Mfundisi, ngokutsho lezizinto uyasithuka lathi. 46 Kodwa wathi: Maye lakini zazimthetho! Ngoba lethwesa abantu imithwalo enzima ukuthwalwa, kodwa lina uqobo lwenu kaliyithinti leyomithwalo ngomunye weminwe yenu.

47 Maye kini! Ngoba lakha amangcwaba abaprofethi, laboyihlo bababulala. 48 Ngalokhu-ke lifakaza ukuthi livumelana lemisebenzi yaboyihlo; ngoba bona bababulala, lina-ke liyawakha amangcwaba abo. 49 Ngalokhu-ke lenhlakanipho kaNkulunkulu yathi: Ngizabathuma abaprofethi labaphostoli, labanye babo bazababulala babaxotshe; 50 ukuze kubizwe kulesisizukulwana igazi labaprofethi bonke elachithwa kusukela ekusekelweni komhlaba, 51 kusukela egazini likaAbela kuze kufike egazini likaZekariya owabulawa phakathi laphakathi kwelathi lendlu kaNkulunkulu; yebo, ngithi kini: Lizabizwa kulesisizukulwana.

52 Maye kini zazimthetho! Ngoba lisusile ikhiye yolwazi; kalingenanga lina uqobo lwenu, labangenayo labavimbela.

53 Kwathi ekhuluma lezizinto kubo, ababhali labaFarisi baqala ukumngxamela kakhulu, lokumcunula ukuthi akhulume ngezinto ezinengi, 54 bemthiya, njalo bedinga ukubamba ulutho oluphuma emlonyeni wakhe, ukuze bambeke icala.

Next (Luke 12)